„Културен мост“ е насловена првата македонско-грчка ликовна колонија што од утре до 5 јули ќе се одржува во Струга во организација на здружението на граѓани „Концепт“ од Скопје.

Во рамки на проектот „Читајќи го Балканот“, издавачката куќа „Готен“ вечер од 20 часот во Кино Култура организира разговор со хрватскиот писател Драго Гламузина, кој овој месец е гостин на резиденцијалната програма за писатели и преведувачи на оваа издавачка куќа.

„Ноќна романса за Кочо Рацин“ организира вечер НУБ „Св. Климент Охридски“-Скопје, со што ќе одбележи 110 години од раѓањето на Кочо Рацин и 75 години од неговата трагична смрт.

Македонските стрип-автори Александар Стеванов, Дарко Богданов и Сашо Гачев денеска, на отворањето на тридневната 20-та Балканска смотра на млади стрип-автори во Лесковац, Србија, ќе ја претстават монографијата „Македонскиот стрип во изданијата на новосадски 'Дневник'“.

Музички, филмски и театарски остварувања од млади творци од сите земји кандидати за влез во ЕУ - Македонија, Србија, Албанија, Косово, Црна Гора и Босна и Херцеговина ќе бидат претставени денеска на културно-уметничкиот хепенинг „Млада Европа на Балканот“.

Околу 250 исполнители на изворни инструменти и песни ќе настапат на годинашниов 44. Фестивал на народни инструменти и песни „Пеце Атанасовски“ што ќе се одржува утре и в сабота, на 29 и на 30 јуни во Прилеп и во Долнени, беше соопштено на денешната прес-конференција во Прилеп.

Претставата „Немам каде да се вратам“ на групата за перформанс Кунстверкштат при Младинскиот образовен форум премиерно ќе биде изведена вечер во кино „Фросина“ во Младински културен центар.

Претставата „Дух“ на Македонскиот народен театар, која вечерва требаше да биде изведена во рамки на „Скопско лето“, од технички причини е одложена за утревечер од 21 часот за кога ќе важат и билетите, соопшти Дирекцијата за култура и уметност-Скопје по известувањето од МНТ.

Министерот за култура Асаф Адеми денеска имаше работна средба со Дритеро Касапи, директор на Шведскиот национален театар „Рикстеатерн“.

Под слоганот „Симнуваме капа“ (Hats off), од 22-ри до 29 септември во Битола ќе се одржува 39. Интернационален фестивал на филмска камера „Браќа Манаки“, за кое интензивно се прават подготовките, соопшти денеска на прес-конференција во Скопје раководството на фестивалот.