Финалето на женскиот фудбалски Куп ќе се игра на тренинг центарот „Петар Милошевски“ во Скопје

Екипите на Каменица Саса и АСС Унитед на 18 мај со почеток од 16 часот ќе се соочат во женското финале од Купот на Македонија. На натпреварот кој ќе се одигра на тренинг центарот „Петар Милошевски“, двата тима ќе се обидат да стигнат до својот прв трофеј од ова натпреварување.

Како што пренесуваат од Фудбалската федерација на Македонија, за тренерот на Каменица Саса, Зоран Златковски, освојувањето на трофејот во Купот на Македонија е приоритет, бидејќи како што вели, резултатите во првенството не соодветствуваат со квалитетот на екипата.

– Како тренер и предводник на екипата очекував подобри резултати во досегашниот тек од првенството, со оглед на тоа што поседуваме голем потенцијал и квалитет. Приоритет ни е освојувањето на Купот на Македонија, иако нема да се откажеме ниту од борбата за првото место во првенството. Подготвени сме за натпреварот, со нетпрпение и голема желба го очекуваме финалето и се разбира дека очекуваме победа во нашето прво финале од историја на клубот, рече Златковски.

Дополни дека имаат голема почит за екипата и тренерот на Ас Јунајтед, Астрит Мерко, кој врши одлична работа.

– Противникот има квалитет и одлично функционираат како тим. Сметам дека ќе биде неизвесно и детали ќе го одлучат победникот. Очекувам интересен натпревар, неизвесен и борбен до самиот крај. Се надевам на победа и славје во Каменица, посочи тој.

Астрит Мерко, тренерот на АСС Унитед, вели дека противникот е поискусен, но, верува во своите млади фудбалерки и вели дека ќе дадат сѐ од себе да победат на натпреварот.

– Го познаваме одлично тимот на Каменица Саса, поседуваат квалитет, играат одлично во последните неколку сезони во првата лига на Македонија. Очекувам интересен натпревар, голема борба и пожртвуваност кај двете екипи. Посакувам коректен натпревар. Верувам во моите фудбалерки. Имаме млада екипа која поседува потенцијал, речиси сите се репрезентативки и во натпреварувачки ритам. Ќе дадеме сѐ од себе за да победиме, рече Мерко.

Според него, предност за Каменица САСА можеби претставува фактот што имаат поискусни фудбалерки и фудбалерки што доаѓаат од странство, но, како што вели, „на крајот тоа не мора да биде пресудно“.

– Верувам дека ќе биде неизвесно до самиот крај. Нека победи подобриот, порача тој.

Скопје 2014 е последен освојувач на пехарот од Женскиот Куп на Македонија од финалето одиграно 2019 година против Тиверија.