Швјонтек поради повреда го откажа настапот во Мадрид

Најдобрата светска тенисерка Ига Швјонтек го откажа настапот на ВТА 1000 турнирот во Мадрид поради повреда на десното рамо, објавија денеска организаторите.

Турнирот во главниот град на Шпанија почнува утре, а полската тенисерка беше меѓу главните фаворитки за титулата.

Швјонтек зад себе има серија од 23 натпревари без пораз и четири освоени турнири годинава.

Таа триумфираше на ВТА 1000 турнирите во Доха, Индијан Велс и Мајами, а во неделата го освои и турнирот во Штутгарт, совладувајќи ја во финалето Белорусинката Арина Сабаленка.