САД ќе бараат суспензија на Русија од Советот за човекови права на ОН

„Учеството на Русија во Советот за човекови права е фарса. Тоа е погрешно, затоа сметаме дека е време Генералното собрание на ОН да гласа и да ја отстрани Русија од тоа тело“, изјави американската амбасадорка во ОН Линда Томас-Гринфилд

Од почетокот на руската акција во Украина, Генералното собрание на ОН усвои две резолуции со најмалку 140 гласа „за“, со кои се осудува Русија.

„Мојата порака за тие 140 земји кои храбро застанаа заедно е дека сликите од Буча и уништувањето низ Украина бараат од нас сега да ги усогласиме нашите зборови со акцијата“, рече таа.

Во саботата на интернет се појави видео на кое се гледаат тела на улиците на градот Буча, недалеку од Киев.

Русија ги отфрли обвинувањата дека нејзините сили извршиле злосторства врз 20 цивили.

Двотретинско мнозинство од 193-членото собрание во Њујорк може да ја суспендира државата од Советот поради, како што се вели, упорно извршување на груби и систематски прекршувања на човековите права за време на нејзиното членство.