Во австралиската држава Викторија, повеќе од 40 припадници на полицијата се суспендирани бидејќи одбиле да се вакцинираат против Ковид-19, поради што им се заканува можност за отпуштање од работа.

Имено, во таа земја е воведена задолжителна вакцинација за многу државни и приватни дејности. Само оние вработени кои не можат да се имунизираат поради здравствени проблеми се изземени од оваа одредба, пишува Гардијан.

Полициската управа на Викторија денеска потврди дека 34 полицајци и девет чувари не го испочитувале налогот за вакцинација издаден од надлежните органи. Тие се суспендирани и им се заканува последователна дисциплинска мерка, односно можат да добијат отказ.

Во Викторија денеска се потврдени 1.903 нови случаи на коронавирус, а уште седум лица починаа како последица на инфекција со Ковид-19. Речиси 90 отсто од населението во оваа држава на возраст над 16 години примиле прва доза на вакцината.

Шестото по ред заклучување во пошироката област на Мелбурн завршува в четврток на полноќ. Одлуката за укинување на „локдаунот“ е донесена бидејќи 70 отсто од граѓаните се целосно вакцинирани.

Од петок, на домаќинствата ќе им биде дозволено собирање до 10 лица, полицискиот час ќе се укине и нема да има ограничувања за движење во градското подрачје. Ќе се отворат и кафулиња и ресторани, со дозвола до 20 вакцинирани гости да останат во затворените делови на угостителските објекти.


Администратор
18/10/2021 23:39