Негодувања во јавноста откако знамето и боите на Македонија ги нема на новиот бордо дрес на македонските репрезентативци

Фудбалската федерација на Македонија (ФФМ) денеска официјално ги претстави во јавноста новите дресови со кои националниот состав ќе настапи на претстојното Европско првенство.

Германскиот производител на спортска опрема „Јако“, кој традиционално ги „облекува“ македонските фудбалери, изработи три комплети дресови, кои се во бордо, бело-жолта и црно-портокалова комбинација. На предната страна на дресовите, изработени од рециклирани материјали, е исцртан лик на балканскиот рис.

Македонските фудбалери својот прв натпревар на Европското првенство го играат на 13 јуни во Букурешт против Австрија, по што следат пресметките со Украина и Холандија.

Во јавноста пак, низа негативни реакции за новиот дрес со кој треба нашите фудбалери да настапат на претстојното првенство поради тоа што ги нема боите на знамето како претходно, а на социјалните мрежи веќе се организира и петиција за враќање на стариот дрес.