Снегот во дебарско не прави проблем за нормално одвивање на патниот сообраќај

Жителите од дебарскиот поширок регион пролетта ја пречекаа со снежна покривка, со дебелина од најмалку десеттина сантиметри во градот, а многу повисока во руралните населени места.

Снегот кој почна да паѓа од синоќа, но и денес, ама со послаб интензитет, засега не причинува поголеми проблеми во нормалното одвивање на патниот сообраќај.

Сепак, поради влажните коловози и остатоци од растопен снег се препорачува внимателно возење и почитување на патната сигнализација.

-Сообраќајот се одвива непречено, но по влажни коловози а на одделни места и со остатоци од кашест снег. Нашите екипи се постојано на терен, во расчистување на истите а имаме доволно абразивен материјал, сол и песок и нема никаков проблем. Сепак препорачуваме внимателно возење и строго почитување на сообраќајната сигнализација, препорачуваат од дебарската секција на ЈП „Македонија пат".

Под надлежност на дебарската секција се делницата Дебар-Жировница, на патот кон Маврово, Дебар-Глобочица, кон Струга, патот Мелнички Мост-Центар Жупа, кракот од Бошков мост кон селата од Мала Река, како и патот кон граничниот премин „Блато" или во должина од околу 120 километри.

Дебарскиот поширок регион помала снежна покривка го обелеа и на 10 овој месец.

Локалните власти на општините од овој регион веќе ги превземаат потребните активности во расчистување на снегот до населените места, а во градот и од тротоарите, бидејќи на улиците тој не се задржува.

Снегот, кого го има во поголема количина на планиските места, секако е добредојден за зголемување на дотекот на вода во реките а со самото тоа и во акумулацијата „Дебарско Езеро".