Снег на планините во дебарско, дождот предизвикува помали одрони на патиштата

Поради помали одрони од камен и земја, влажните коловози и појавата на можна голомразица, посебно на осојничавите места во утрнските часови, на патните правци во поширокиот дебарски регион се препорачува внимателно возење.

-По дождот што врнеше во изминатите два дена а и попладнево, има појава на помали одрони од камен и земја, што е вообичаена појава. Нашите екипи се постојано на терен во нивно расчистување и сообраќајот се одвива без поголеми проблеми. Препорачуваме многу внимателно возење и строго почитување на патната сигнализација, порачува Деар Лиманоски, раководител на секцијата.

Посебна внимателност се препорачува кај селата Рајчица, Косоврасти и Јанче, месноста Ростушки Мост, потоа во близина на Бигорски манастир и месноста „Сенечки ливади”, на патниот правец Дебар – Маврово, како и кај месноста „Три чешми” на патот кон Струга, и месноста „Кокошкина краста” на патот Мелнички Мост-Центар Жупа,каде најчесто има одрони.

По долгата суша, дождот е добредојден за земјоделските посеви а се очекува да го зголеми и дотекот на вода во Дебарско езеро од реките Радика и Црн Дрим, како и двете реки кои од Жупа се влеваат во езерото,чија кота поради сушата е речиси на минимум.

Денеска снегот ги обеле планинските врвови на Кораб, Крчин, Стогово и Бистра.