Град Скопје апелира кабастиот отпад за време на „Black Friday“ да се остава на вистинско место

Град Скопје апелира до граѓаните за време на „Black Friday” да го оставаат кабастиот отпад на местата за складирање. Оттаму потсетуваат дека амбалажата за пакување на големи производи, особено за бела техника, но и старите електронски уреди и мебел, се третираат како кабаст отпад и не треба да се ставаат во садовите за отпад.

– Овој вид отпад да се одложи во центрите за селекција на отпад на ЈП „Комунална хигиена” во Карпош и Вардариште, без плаќање паричен надоместок. Исто така, граѓаните можат на бесплатниот телефонски број 0800 222 33 да ја нарачаат услугата за подигнување и транспорт на кабастиот отпад со специјалните возила на ЈП „Комунална хигиена”. Услугата за собирање кабаст отпад од домовите на граѓаните се наплатува согласно со ценовникот на ЈП „Комунална хигиена”, информира Градот.

Најавуваат кампања за правилно одложување на кабастиот отпад за време на „Black Friday” и засилени инспекциски контроли за неправилно одложување и санкционирање на прекршителите.

– Комуналните инспектори и редари, утре (27.11.2020) во поголемите трговски објекти ќе ги советуваат и едуцираат потрошувачите како правилно да го одложуваат кабастиот отпад. Согласно со правилата за третман на отпадот, амбалажата за пакување на големите производи (особено за бела техника), но и старите електронски уреди и мебел се третираат како кабаст отпад и не треба да се одлагаат во садовите за отпад, што беше честа појава изминатите години околу трговските објекти за време на овие попусти, велат од Град Скопје.