Трипуновски: Власта функционира само пред камери, на терен само една компанија врши откуп на тутун

Дополнителниот заменик министер за земјоделство, Цветан Трипуновски денеска по втор пат беше во општина Долнени на барање на тутунарите од селата Новоселани, Дебреште и Ропотово, откако до него, како што вели тој, пристигнале неколку поплаки дека не се врши откуп на тутун.

- Министерот Трајан Димковски заедно со Шапуриќ во саботната посета од затворен тип на општина Долнени ветувале многу, а не исполниле ништо. Веќе во понеделникот биле затворени откупните пунктови, а во моментов само една компанија врши откуп на тутун. Меѓутоа и тутунот што се откупува е со пониска цена и класа од реалната. Проблем плус е увозот на тутун и досега се увезени над 600 тони тутун додека домашниот не се откупува, истакна Трипуновски во изјава за медиумите по посетата во Долнени.

Ваквите лаги и манипулации со земјоделците мора да престанат порача Трипуновски.

-Од оние поплаки коишто ги добивам секојдневно дека откупот е стопиран, освен онаа компанија каде што се наоѓаме сега, останатите ги имаат затворено откупните пунктови, а и таму каде има минимален окуп проценката е нереална. Последна бројка којашто ја добив внатре од министерството е дека во Република Македонија се внесени преку шестотини тони тутун. Тоа значи со последната измена којашто ја критикувавме и требаше да се заштити домашното производство се дозволи да се увезува тутун, а овие луѓе коишто овде произведуваат најквалитетен тутун во светот да остане под знак прашање дали ќе биде целосно откупен, вели Трипуновски.

Тој истакна исто така дека повеќе од очигледно е дека оваа власт не е способна, ниту е заинтересирана, ниту е кадарна да ги реши проблемите.