Во мултимедијалниот центар „Мала станица“ вечер ќе биде отворена самостојната изложба на ликовниот уметник и редовен професор на Факултетот за ликовни уметности при Државниот тетовски Универзитет, Башким Меџити.

Меџити дипломирал на Факултетот за ликовна уметност во Приштина (Косово), каде и магистрирал. Добитник е на повеќе награди и признанија, остварил над петнаесетина самостојни изложби во државата и странство. Бил прв претседател и еден од иницијаторите за формирање на Здружението на ликовни уметници „Draudacum“ од Гостивар, оснивач на Факултетот за ликовна уметност при Државниот тетовски Универзитет. Активно се занимава со сликарство и скулптура.

Во Националната Галерија ќе се претстави со триесетина дела од последниот циклус на слики во техника акрил на платно изработени во текот на оваа година. Апстрактниот експресионизам е правецот во кој го реализира ликовниот израз. Случки од природата, урбаната средина и пејзажите ги пренесува во тоналитет на интензивни бои, до смирена бела и контрастна црна.

Изложбата, која го носи насловот „Сертификат за кафе“ заради триптихот кој е создаден во доба на глобалната пандемија, ќе ја отвори директорката на Националната Галерија, Дита Старова Ќерими.


Администратор
19/10/2021 10:44