Ученици од гимназијата „Љупчо Сантов“ во Кочани ќе искористат парична награда за набавка на таблети за своите соученици

Учениците од гимназијата „Љупчо Сантов“ од Кочани, кои се пласираа меѓу петте победнички тимови на програмата за социјално претприемништво преку проектот UPSHIFT , ќе ја искористат паричната награда за да реализираат хумана претприемачка идеја.

Со грантот вреден две илјади евра тие ќе набават производи за продажба на граѓаните, а со остварениот профит ќе им купат миникомпјутери и таблети на своите соученици од социјално ранливите категории.

– Со тимот одлучивме да помогнеме во следењето на онлајн-наставата за дел од учениците во училиштето. Нашата идеја ја презентиравме пред комисијата од Фондот за иновации и технолошки развој и од фондот „ЦЕЕТ Македонија“, од каде заедно со уште четири тимови од други училишта во државата, добивме грант што е наменет за комплетна реализација на претприемачката активност, истакна ученикот Ефто Трајчев, учесник во проектот.

Учениците имаат изготвен план според кој ќе се рекламираат производите и ќе се реализира продажбата.

– Нашиот тим креираше препознатливо име, „Avemil Charity“ што претставува акроним од имињата на членовите, а настапуваме под мотото „Здравје и имиџ кон заедничка победа“. Преку е-шоп ќе нудиме продажба на маски и марами, модни додатоци, чаши, термоси и други производи, при што за електронската продажба креиравме профил на социјалните мрежи, а ќе организираме и непосредна продажба, истакна Ана Арсова, учесничка во проектот.

Во проектот се вклучени и учениците Леонид Петров, Ивона Тодорова и Михајло Штерјов, а петчлениот тим ќе работи под менторство на професорот по претприемништво, Виктор Атанасовски.

Проектот UPSHIFT е развиен од УНИЦЕФ со цел преку решавање одредени социјални проблеми и предизвици да им овозможи на младите да развијат нови вештини, да научат повеќе за социјалното претприемништво и да стекнат нови пријателства.