Нема место во болниците во Прилеп, Струмица, Куманово и Велес за хоспитализирање на Ковид-19 пациенти

Нови 364 случаи со Ковид-19 се регистрирани во изминатото деноноќие, соопшти денеска на прес-конференција министерот за здравство Венко Филипче.

Есента дојде состојбата со вирусот е многу сериозна, посочи Филипче и додаде дека Европа и светот постепено се затвораат со силни рестриктивни мерки.

– Како ќе се развива состојбата кај нас, во која насока ќе се движиме, колку брзо ќе го стабилизираме и овој удар зависи од однесувањето на граѓаните и почитувањето на сите мерки и препораки кои се на сила. Здравствениот систем е подготвен да се бори и ќе се бори со вирусот. Имаме план за реорганизација на болнички капацитети и кадар за да одговориме на предизвикот по системот на ротација, нешто што подолго време функционира, но ни треба и сериозна поддршка на граѓаните. Потребно е одговорно и совесно однесување за да превенираме пренатрупување на болниците, тоа не смееме да го дозволиме. Сега е време сите максимално сериозно да пристапиме кон претстојниот период. Воопѓшто не е тешко и комплицирано да се следат основните правила за заштита, рече Филипче.

Потенцира дека на сите инфективни одделенија во државата се хоспитализирани 414 пациенти, што е најголем број на хоспитализации од крајот на јули. На Инфективната клиника, нагласи, има 86 пациенти, во ГОБ „8 Септември“ – 40 пациенти од кои четири се на респиратор, а во болницата во Козле се хоспитализирани три деца и две суспектни за кои се чека резултат.

– Во сите одделенија во државата има значителен број пациенти, некаде капацитетот е целосно исполнет и пациентите се испраќаат во Скопје. Има слободни места во Охрид, Гостивар и во Тетово. Има 46 пациенти во болницата во Струмица и таму од утре ќе се подготвува капацитетот на новото крило, каде има опрема, материјали и се што е потребно за таму да бидат сместени пациентите. Целосно е подготвена болницата во Кочани, каде сега нема хоспитализирани пациенти за тој регион, има 60 кревети кои се подготвени за пациенти, двајца интернисти и двајца анестезиолози. Целосно подготвено е и празно одделението со 14 кревети во Кавадарци и значаен број слободни кревети кои можат од обичните одделенија да се адаптираат за третман на пациенти во болництаа во Тетово, истакна Филипче.

Тој се осврна и на денеска објавениот неделен извештај на Институтот за јавно здравје во периодот од 28 септември до 4 октомври, и посочи дека тестирани се вкупно 9.832 материјали, а регистирани 1.203 нови позитивни случаи, што е зголемување за 35,5 отсто во однос на минатата недела. Најголем број од регистрираните случаи се од Скопје (n=519; 43,1 отсто), а највисока неделна инциденца е регистрирана во Берово – 192,3 на 100.000 жители.

– Процентот на позитивни случаи од тестирани во овој период изнесува 12,2 отсто или три отсто повеќе во однос на претходната недела. Регистрирани се заболени лица во сите возрасни групи. Најзастапена е возрасната група на лица на возраст над 60 (19,9 отсто), а најмал број е регистриран кај децата на возраст до девет години (3,2 отсто) и од 10 до 19 години (7,5 отсто). Во однос на минатата недела, најголемо зголемување на бројот на новорегистрирани случаи се бележи во возрасните групи од третата и четвртата декада за 60 отсто односно 46,1 отсто. Од новозаболените, 13,2 отсто биле хоспитализирани, а кај 280 (26,1 отсто) лица е регистрирано присуство на коморбидитети, рече Филипче.

Од вкупниот број нови случаи, појасни, 37,6 отсто потврдиле контакт со потврден случај, а три отсто имаат историја на патување во последни 14 дена. Потенцира дека за оздравени се водат 786 лица, што претставува зголемување од 10 отсто во однос на претходната недела.

– Пријавени се 30 смртни случаи, 7,1 отсто повеќе во однос на претходната недела. Во однос на возраста, 24 лица биле на возраст над 60 години, а шест лица на возраст од 50 до 59 години. Дваесет и девет од случаите биле хоспитализирани, а само едно лице од починатите не било хоспитализирано. Коморбидитети се регистрирани кај 20 починати лица, рече Филипче.

Бројот на новозаболени продолжува да расте со два милиони нови случаи неделно во светот, истакна министерот и додаде дека според неделниот извештај на СЗО во периодот од 28 септември до 4 октомври на глобално ниво бројот на нови случаи неделно останува два милиони секоја од изминатите три недели.

– Кумулативно вкупно над 34,8 милиони позитивни случаи, над еден милиони смртни случаи се бележат на глобално ниво од кои најголемиот дел во Америка (55 проценти) и во Европа (23 проценти). Зголемен број случаи има во речиси сите европски земји и во т.н. црвена зона на картата на Европскиот центар за превенција и контрола на инфекциите се наоѓаат Шпанија, Чешка, Франција, Холандија, Белгија, Лусембург, Исланд, Унгарија и Данска, а сега им се придружува и Велика Британија. Земјите во ЕУ сите бележат раст и овој тренд се очекува да продолжи и понатаму. Се воведуваат зајакнати рестирктивни мерки за спречување на ширење на вирусот во есенскиот бран особено таму каде има зголемен број заболени лица и речиси сите земји воведуваат нови мерки, а некаде има и рестрикции во движењето, рече Филипче.

Додаде дека есенскиот бран го зафати и регионот и се бележат рекордни бројки на новозаболени – во Словенија – 356, во Бугарија- 436, во Албанија – 162, а висок е бројот на заразени и во Хрватска, Грција и Црна и Гора.