Продолжува донирањето за доизградба на собирниот храм „Св.Кирил и Методиј” во Делчево. Како еден од првите донатори градоначалникот на општина Делчево, Горан Трајковски, испрати апел до граѓаните и до фирмите во Делчево да се вклучат во донаторската акција.

-Испраќам апел до сите поединци, но и фирми, да донираат и сите заедно да бидеме горди на верскиот храм, кој по својата габаритност и убавина, ќе биде украс на градот и најголем и најубав верски објект во регионот. Станува збор за храм кој го носи потписот на сите нас, посветен на браќата Кирил и Методиј кои Делчево ги слави како свои заштитници, истакна Трајковски.

Неговиот пример го следеа и останати вработени во локалната самоуправа, а донации се собираат и во институциите во Делчево.

Доизградбата на соборниот храм „Св.Кирил и Методиј“ е во завршна фаза. Со поддршка од донаторот Милен Врабевски и Фондацијата „Бугарско сеќавање“, изградена е фасадата на црквата, а поставени се и влезните врати кои се донација од фирмата ДООЕЛ „АлДариво“ од Пехчево.

Неодамна, Општина Делчево отвори посебна сметкa, на која ќе можат да се уплаќаат донации за доизградба на соборниот храм „Св.Кирил и Методиј“ во Делчево. Донации можат да уплаќаат и правни и физички лица.


Администратор
18/09/2019 12:46